بتحبوا بعض ... بس دى مهندسة ولادكتورة وانت دبلوم او معاك ثانوية

السلام عليكم
ازيكم يا اهل نجم الأهلى الكرام الطيبين .. يارب الكل بخير وبصحه وبينعم برضا ربنا ورحمته.
انا جاى فى موضوع كدا وماشى تانى والموضوع دا خطير جدا فى وجهة نظرى ان لم يكن كذلك عندكم....
الموضوع ببساطه كالاتى .......
كتير اوى بيحصل بينا حب من اول نظره وحب نتيجة مواقف حصلت بين اتنين ميعرفوش بعض واللى حبوا بعض فى الاتوبيس واللى اعجبت بواحد فى القطر واللى وقع منها كتابها وجابهلها البرنس وكدا .الخ...الخ..
القصد ان اول شعور دا اتولد لا اراديا اوتوماتيك وممكن لو الموقف شديد واستغله الطرفين صح يختصر وقت طويل اوى يوصلوا فيه لمسافات طويله فى مشوار الحب .
هيا لا حبته علشان اشطر واحد فى الفصل ولا علشان الاول على الدفعه ولا علشان فتى احلام صاحباتها والبنات هتموت عليه ..لا خالص .. دا ممكن يكون معفن فى لبسه وشعره بدال الجيل زيت موبيل( 1) وراجع من شغله يا عينى مهدود الله يعينه صاحى من الفجر يشوف شغله مش شاغل باله الا مستقبله وانه نفسه يكون حاجه تشرفه وتشرف اهله وربنا يدومها طول ما هيا بالحلال.
شافته البشمهندسة سها ولا الدكتورة مى وشافت فيه بشاشه الوجه وطيبة الملامح والرجولة الصادقة وغصب عنها اعجبت بيه وهو كمان قلبه دق وميعرفش مين هيا ولا بنت مين ولا فى اى كليه ..صحيح ما الثانوى الفنى بيلبس بلطوا ابيض يعنى معليهوش لوم الراجل بصراحة.
اتكرر المشهد مره واتنين وتلاته مع اختلاف الحدث لحد ما اتكلموا واتعرفوا ببعض .
ارتاحتله واطمنتله وهو كمان بقى حاسس انه بنى ادم تانى خاااالص ..يمشى فى الشارع يغنى لعبد الحليم وشويه عمرو دياب وبدا يقف قدام المرايه اللى كان راميها تحت سريره ويغير مظهره وكل دا ميعرفش انها حاجه كبيره عليه وبعيده عنه.
هيا بقى بئت بتنام تعد فى الساعات والدقايق اللى باقيه على مقابلته واللى هتشوفه فيها لا فرق معاها كونها تعليم عالى ولا كونه اقل منها ..
هو راجل محترم بيتقى ربنا فيها واخلصلها وجهز نفسه وفرش شقته وظبط نفسه لمستوى يليق بيها وهيا طول الوقت معاه ومشجعاه ومدياه الامل .... شوفتو اد ايه الحب جميل طول ما هو صادق..

حدد معاد مع باباها ولانه اقل منها فى التعليم ( اتـــــــــــرفــض )
شوفتوا اد ايه احنا تعساء فى حياتنا واد ايه فرحتنا قصيره وحلم عاشوا يحلموه سنين اتقلب كابوس فى كلمه واحده ..

مشكور اسلام على الموضوع فعلا بيحصل كتير
ومش ذنبه ولا ذنبها بس هنعمل ايه فى المجتمع اللى عايشين فيه

مشكور محمد عالمرور